Cuspair sgrùdaidh
Cìs dùmhlachaidh Lunnainn
Feumaidh dràibhearan pàigheadh airson dràibheadh ann an sòn na cìs dhùmhlachaidh. 'S e an t-amas dràibhearan a dhì-mhisneachadh bho bhith a' cleachdadh an t-sòna seo aig amannan trang agus còmhdhail phoblach a chleachdadh an àite sin gus dùmhlachadh, an ùine ann an sreathan trafaig, truailleadh agus a' chosgais dhan eaconamaidh a lùghdachadh. Tha an t-airgead a tha ga chruinneachadh air a chleachdadh gus còmhdhail phoblach a leasachadh, me chaidh busaichean ùra a cheannach agus chaidh seann charbadan a bha a' dèanamh barrachd truaillidh a thoirt às an t-seirbheis.
An toradh
- Chaidh dùmhlachadh trafaig, tubaistean agus ìre truaillidh a lùghdachadh.
- Tha seirbheis nam busaichean nas earbsaiche.
- Tha reic sna bùithtean ann an sòn na cìse air a dhol am meud.
- Chaidh barrachd tasgaidh a dhèanamh ann an còmhdhail phoblach.
Èifeachdas lùtha
Le cleachdadh lùtha a' dol am meud, tha e cudromach gum bi gnìomhachasan, còmhdhail agus daoine nan dachaighean a' cleachdadh lùth ann an dòigh nas èifeachdaiche gus nach bi uiread de dh'ana-caitheamh ann. Caomhnaidh seo cuideachd airgead air connadh. Faodaidh sinn uile cuideachadh le bhith a' dèanamh atharrachadh nar dòigh-beatha agus nar dachaighean – mar eisimpleir le bhith:
- a' coiseachd, a' dol air baidhsagal no air còmhdhail phoblach an àite a bhith a' cleachdadh chàraichean le connadh fosail
- a' lùghdachadh nan turasan air plèanaichean (gu h-àraidh air astar goirid)
- a' cleachdadh chàraichean nas lugha nach bi a' cosg uiread de lùth no càraichean dealain
- a' cur dheth sholais, teàirrdsearan fòn, suidsichean agus telebhiseanan nuair nach eil sinn gan cleachdadh
- ag ath-chuartachadh agus ag ath-chleachdadh bathar plastaig agus bathar stèidhichte air ola
- a' cleachdadh bholgan solais a bhios a' caomhnadh lùth agus bataraidhean a ghabhas an ath-theàirrdseadh
- a' cur dìon-chòmhdach air mullaich thaighean, a' cur stad air gaoth a' faighinn a-steach, a' cleachdadh uinneagan dùbailte agus siostaman teas nas èifeachdaiche
- a' smaoineachadh air pannalan grèine, no ag atharrachadh gu companaidh dealain aig a bheil dealan uaine