Ro-innleachdan airson buaidhean a lùghdachadh
Stòran lùth seasmhach
Airson ruighinn air an t-iarratas air barrachd lùth air feadh an t-saoghail, ach aig an aon àm a' lùghdachadh an dara cuid milleadh air an àrainneachd no blàthachadh na cruinne, tha e cudromach:
- nach bi dùthchannan fo leasachadh a' leagail uiread de chraobhan (dì-choillteachadh) agus gun dèan iad barrachd ath-choillteachaidh (a' cur barrachd chraobhan)
- gum bi dùthchannan a' lorg seòrsachan lùth ùr, a' leasachadh agus a' leudachadh nan stòran a tha an-dràsta nas seasmhaiche na connaidhean fosail
- gum bi gnìomhachasan agus daoine nan dachaighean a' caomhnadh lùth (nach bi iad a' cosg uiread dheth)
- gun tòisich dùthchannan leasaichte ag atharrachadh bho fhosailean connaidh gu stòran eile – lùth grèine, lùth gaoithe, lùth an làin agus lùth dealan-uisge
Loch Laomainn: lùth dealain-uisge
Nuair a thòisicheas dùthaich fo leasachadh a' cleachdadh barrachd lùtha, bi iad air am brosnachadh gus lùth seasmhach a leasachadh agus gus smachd a chumail air fàs san àireamh-sluaigh airson nach cosg iad uiread de lùth.
'S e an t-amas aig seasmhachd gum bi stòran air an riaghladh, no pròiseactan agus gnìomhachasan air an ruith, gus an tèid aig na ginealaich ri teachd air na stòrasan a chleachdadh cuideachd.
Tha mòran dhùthchannan air feuchainn ri cleachdadh agus caitheamh chonnaidhean fosail stèidhichte air carbon a lùghdachadh mar thoradh air uallach eadar-nàiseanta. Shoidhnig mòran dhùthchannan Protocail Kyoto, leis an do gheall iad sgaoileadh gasaichean taigh-glainne a lùghdachadh.
Creideas carbon
Tha an sgeama seo ag amas air sgaoileadh gasaichean taigh-glainne a lùghdachadh. Tha e stèidhichte air a' bheachd gum bi an luchd-truaillidh a' pàigheadh a rèir 's na tha iad ag adhbhrachadh de thruailleadh. 'S e am beachd gum bi daoine air am brosnachadh gus nas lugha de thruailleadh adhbhrachadh, seach gun cosg e dhaibh ann an cìsean carbon.